مرسى ..قوم اقف يا مرسى
تعرف ايه عن المنطق يا مرسى؟ اعرف ان لما واحد يضرب واحد يقع ما يحطش منطق هو دا المنطق ولا مش هو؟ هو ولا مش هو يا استاذة يا متسقفين يا بتوع المدارس
طيب .. مرسى الزناتى طالب فاشل ما يعرفش حاجة فى البطاطس
وقال اجابة غلط تعرفوا انتوا ايه بقى عن المنطق
هل المنطق بتاعكوا ان الواحد يضيع من عمره 6 سنين فى ابتدائى وبعدين 3 فى اعدادى وبعدين 3 فى ثانوى من غير ما يتعلم فيهم اى حاجة (يتعلم بجد مش يصم ويطرش)
وبعدين يدخل اخر كلية كان يحب او يتصور انه يدخلها وييع كمان 4 سنين (7 لو دخل طب)
على الارض ودا اصلا فى حالة نجاحه الشىء المنطقى الوحيد فى الموضوع انه فى نهاية كل تلك الهرتلة يتخرج من الجامعة ابيض يا ورد
ما يعرفش اى حاجة عن اى حاجة لا يملك من حطام حياته سوى شهادة تخرج يستطيع ان يذهب بها الى عم عزيز بتاع البراويز ليعلقها فى صالون المنزل ويفرح باباه ومامته بيه ويرفع راس عيلته قدام الجيران
بعد هذا يصبح متأهبا لمواجهة الحياة بعقل انضف من الصينى بعد غسيله
وقلب متهربد من علاقات الحب الفاشلة التى لم تخرج عن اطار الوقفة على كوبرى قصر النيل وغيره من الاماكن فى انحاء البلد المكدسه تماما ببنات واولاد واقفين يحبوا فى بعض
لن يتزوجوا لانهم اصلا مش لاقيين ياكلوا ولن يصلوا فى قصة حبهم الى ابعد من تلك التعليقة على الكوبرى ناهيك طبعا عن الجيوب الخاوية والكبد والطحال المهريين من كتر شرب الشاى والقهوة والشيشة اثناء لعب الدومينو والطاولة على القهوة
هل هذا هو المنطق؟
طبعا واضح جدا ان عنينا فارغة بدال ما نحمد ربنا ونبوس ايدينا وش وضهر على مجانية التعليم (اللى لا هى مجانية ولا هى اصلا تعليم
بنتبطر على النعمة واضح ايضا اننا مش واخدين بالنا من النهضة الشاملة التى تمر بها البلاد اليومين دول والمؤتمرات اللى بتعملها لجنة السياسات كل يوم للشباب
وفرص العمل الهائلة التى فوجىء بها الشباب تسقط على رؤوسهم (تقولش مطرة
اما بالنسبة لسقف الحرية المتاح للشباب والمناسب لتنمية ابداعهم وقدرتهم على الابتكار فحدث ولا حرج حيث تم توسيع هامش الديمقراطية
( اكتر ما هو اصلا واسع)
بحيث يتحرك الشباب جواه براحتهم ( جوا الهامش )
منطق ايه بس اللى بتتكلموا عنه؟
بلد غير منطقية يعيش بداخلها مجتمع غير منطقى تحكمه حكومة غير منطقية تتصرف تصرفات غير منطقية وجايين تتشطروا على الواد الغلبان مرسى الزناتى وتقولو له
تعرف ايه عن المنطق؟
قولوا رأيكوا بصراحه
عاجبكم حال التعليم فى مصر ؟
الخميس يناير 28, 2016 11:02 am من طرف 
موضوع: تعرف ايه عن المنطق ؟!!يامرسي 